Header Ads

منطالب بسحب الجنسية اللبنانية من المصري إسماعيل أحمد !!

إسماعيل أحمد، اللاعب المصري يلي عمرو ٤١ سنة، اجا على لبنان عام ١٩٩٦ مع فريق الإسكندرية المصري ولعب ببطولة العرب يلي صارت بلبنان على أرض نادي الكهربا، وربح البطولة على حساب نادي الحكمة بوقتا. من بعدا بسنة وحدة، اجا على لبنان مع فريق المصري تيعمل معسكر، وبوقتا قدملو فؤآد أبو شقرا عرض ليلعب مع فريق الوردية يلي كان يدربو أبو شقرا، وهيك بلشت مسيرتو بلبنان، لعب من بعدا مع الحكمة بالبطولة العربية ولمع اسمو بوقتا من بعد ما لبس قميص النادي الأخضر. إسماعيل ما بخلي مباراة ما بيستفز جمهور الحكمة يلي لحم كتافو من وراهن. اشكالات ومشاكل وصراعات واحتكاكات مباشرة بعد الأحيان بينو وبين هالجمهور، ويلي صار مبارح كان عينة صغيرة من أخلاق هاللاعب الرياضية ويلي ما بخلي صفرة حكم ما بشارع عليا إذا كان هو أو فريقو مخطئين. إسماعيل أخد الجنسية اللبنانية بعد ما ورد اسمو ضمن ال ٦٤٤ شخص يلي منحن رئيس الجمهورية الأسبق ميشال سليمان الجنسية اللبنانية على طبق من فضة ويمكن من دهب....
على كل حال، بما إنو إسماعيل ما قدم أي شيء للبنان، وما لعب بالمنتخب اللبناني كونو ما بيقدر أصلا لأن لعب للمنتخب المصري قبل، وكونو ما عم يلعب ببلاش وكون لحم كتافو من لبنان وكون جمع الملايين من ورا لبنان، هلق ما مننكر إنو لاعب كبير وبيلعب حلو وكل شي، بس ما عم يلعب ببلاش، ما عم يقدم شيء للبنان لحتى نقدملو هالجنسية يلي مدفوع حقا دم تيبقى لبنان !! إسماعيل فوق هيدا وكلو ما بيحترم الجمهور اللبناني وخاصة الحكمة وكذا مرة إستفز النادي وجمهورو العريق ويلي منرجع منقول إنو لحم كتافو من ورا !! 
نحن منطلب من الدولة اللبنانية إعادة النظر بعملية إهداء الجنسية اللبنانية، وكما منطلب سحب الجنسية اللبنانية من المصري إسماعيل أحمد ليكون عبرة لغيرو ويلي أصلا لهو ولا غيرو بيستحقو شرف الحصول على الجنسية اللبنانية العظيمة !!  

No comments