Header Ads

بالتفاصيل: لماذا يحتفل العالم بميلاد الرب يسوع في ٢٤ ك١ ؟ وما علاقة الفينيقيين ؟

Related image

من وحي عيد الميلاد... قصة تاريخ وحضارة 
كانو جدودنا الكنعانيين يحتفلو بأَهَم عيد عندن وهوّي "عيد ميلاد الإله إيل" اللي كان معروف بعيد الشمس بتاريخ 24 ك1 من كل سنة. 
وبعد مجيء المسيح تبَنِّت الكنيسة العيد، بذات التاريخ، وبذات الاسم، علمًا أنو المسيح ما وِلِد بتاريخ 24 ك1، وقالِت للناس ببلاد كنعان-فينيقيا أنو الإله "إيل" اللي بتعيدولو كل سنة بـ 24 ك1، تجسّد وصار إسمو "عمانو-إيل"، يعني "إيل معنا". وهيك الكنعانيين الفينيقيين فرحو وقِبلو بالمسيحية لانها بتشبهن...
والعيد عنّا كفينيقيين كنعانيين (يعني قبل ما صار قسم مِنّا مسيحيين وبَعدَين قسم مِنّا مسلمين)، كان اسمو "عيد الآب إيل". 
ومن بعد ما أَخَدْ اليونانيين كعادتهن الإله إيل لَيِعبدو، متل ما سَبَق وأخدو منّا الأدون وعِملو ادونِس، قامو بتحريف اسم إيل شوي؛ يعني الإله أيل اللي كِنّا نكتبو كنعانيّا إيليا، ونلفظو إيليو، صار عند اليونانيين إيليوس بزيادة حرف السين، ومن هيك صار اسم مدينة بعلبك إيليوس بوليس وأحيانا (هيليو بوليس). ولأن الكنعانيين كانو يعتبرو الإله إيل واهب الحياة، لَقّبو بالشمس اللي بتوهب الحياة للأرض وللناس العايشين عليها.
ومن هيك كانو ينحتو وجّ الإله إيل محاط بهالة شعاع الشمس. ومع الوقت طغى عند الرومان كمان لقب الشمس على اسم الإله إيل، وصار عيد الإله إيل عندن اسمو عيد الشمس متل التسمية الفينيقية..
وجدودنا الفينيقيين الكنعانيين كَرَّمو الإله إيل وبِنيو على اسمو مدينة بيتوسطها قلعة، قلعة بعلبك؛ اللي اسمها بيعني قلعة بعل-بك أي قلعة "السيد الكبير"، والسيد الكبير هوّي إيل الكبير (وكلمة "بك" أو "بيك" بعدها مستعملة لليوم كجزء من اسم بعض العائلات اللبنانية). 
وللتذكير فقط، إنو بناء الجزء الروماني من قلعة بعلبك تم بعد احتلال الرومان للمدينة سنة 47 ق.م. علمًا إنو بعلبك بناها الكنعانيين الفينيقيين سنة 2000 ق.م. وسمّوها مدينة الشمس على اسم الإله إيل المُلَقَّب بالشمس. 
انشالله بمناسبة هالأعياد، من الميلاد، لراس السنة، لعيد الغطاس المكلَّل ببياض التلج، بِضَل الخير ببيوتنا جميعًا دايم دايم.
من زحلة د. عماد شمعون

No comments