باسكال سليمان

 نحنا بدنا ونحنا فينا

نحنا بدنا بس ما فينا
نحنا فينا بس ما بدنا
بعتقد انو الشعار التالت هوّي الأصَح.
القوات اللبنانية تحوَّلِت إلى شعارات، لا سيما منها شعار "وقت الخطر قوّات".
والأغرب، إنّو القوات مِش عمبتصير قوات لأنّو الخطر اللي بدو يعمل منها قوات مِش عمبيجي.
• مقتل الياس حصروني بعين إبل مَنّو خطر كافي تيعمل مِن القوات قوات.
• ومقتل هيثم ومالك طوق بقرنة بيت طوق، بقرنة سوهدِ، قرنة الشهدا، مَنّو خطر كافي تيعمل مِن القوات قوات.
• ومقتل باسكال سليمان بجبيل مَنّو خطر كافي تتصير القوات قوات.
• وإلقاء القبض على رئيس القوات اللبنانية مَنّو خطر كافي تيعمل من القوات قوات وتِمنَع اقتياد رئيسها الى السجن اللي دام 11 سنة.
• وتفجير شبه نووي فجَّر المرفأ ودَمَّر الاشرفية عاصمة الوجود المسيحي بلبنان وبالشرق مَنّو خطر كافي تيعمل من القوات قوات...
يعني بالمختصر المفيد ما في شي رح يعمل من القوات قوات.
يعني ما في شي رح يخلي الحكيم يعبس تنلبس الزيتي: "ويا حكيم لا تعبس بدك عسكر تنلبس".
إنَّ القوّات اللبنانيّة قاعدةٌ مِن ذهب، وإنّما بقيادةٍ باتت مِن تَنَك.
طيب شو بدنا من القوات تنرضى عنها؟
هل بدنا شباب القوات يتسلَّحوا ويسكروا الطرقات؟ كلا
هل بدنا ياهن يهجموا على خيم السوريين ويرجعوهن عسورية؟ كلا
هل بدنا ياهن يهجموا على حزب الله ويشَلحوا سلاحو؟ كلا
هل بدنا ياهن يهجموا على المخيمات ويقشطو الفلسطيني سلاحو؟ كلا
هل بدنا ياهن يداهمو خلايا داعش المعشعشة بلبنان ويقشطوهن سلاحن؟ كلا
هل بدنا ياهن يرَجعوا اموال المودعين؟ كلا
هل بدنا ياهن ينقذوا الاقتصاد اللبناني ويخَلّو الليرة تساوي دولار؟ كلا
طَيب شو بدنا من القوات؟
بدنا إنو قيادة القوات تخلي بشير حيّ فيها بجملة واحدة ومش أكتر، بجملة: "جايي أطلب منكن تقولو الحقيقة"
بدنا مِن قيادة القوات إنو تعيش الإنجيل بآية واحدة ومش أكتر، بآية: ""وَتَعْرِفُونَ الْحَقَّ، وَالْحَقُّ يُحَرِّرُكُمْ»." (يو 8: 32).
بدنا مِن قيادة القوات تبطِّل تلعب دور الحارس الأمين للنظام المركزيّ الوحدوي اللي دمَّرنا.
بدنا مِن القوات تبطِّل تكَذِّب علينا وعَحالها لمّا تقول إنّو الحَلّ بيتحقَّق بقيامة الدولة القويّة اللي ما بعمرنا شفناها ولا عشناها.
الرئيس كميل شمعون وعظَمتو هجموا عليه المتظاهرين بسلاحن وطوَّقوا داخل قصرو، بقصر الرئاسة بالقنطاري سنة 1958، والجيش بوقتها بقيادة قائد ماروني ما تدخَّل وضَل واقف عمبيتفرَّج.
طَيب من الآخر شو بدنا مِن القوّات؟
بدنا مِن القوّات، بصراحة وبكلّ شفافيّة واختصار، إنها تُلفظ كلمة واحدة، ومِش أكتر، كلمة: "الفدراليّة".
بيطلع رئيس القوات بمقابلات تلفزيونية وبيعجن حكي لمدة ساعة واكتر، وكلمة بدنا "الفدرالية" حَلّ للبنان ما بقولها.
ليش مِش عمبقول الحقيقة؟ وكرمال مين؟ كرمال الكرسي.
الشيخ بشير الجميّل بَس قرَّب من الرئاسة شو ضَل منَو غير روفاتو.
العماد ميشال عون اللي حصد 72% من التأييد المسيحي، واللي نقال عنو إنو "جَبَل"، وبس قرَّب مِن الرئاسة شو بقي مِنّو، وشو عِملو مِن عهدو غير جهنم الحمرا اللي هجَّرت الشعب اللبناني ويأسِتو وذَلِّتو وفقَّرِتو.
مسؤول طلابي بالقوات، وهوي عمبيحكي عن الشهيد بسكال سليمان، بقول بكلمتو، بفيديو مسَجَّل: "رفيق الحريري حَيّ فينا، وكمال جنبلاط حَيّ فينا".
كمال جنبلاط رئيس الحركة الوطنية اللي وقفت مع الفلسطيني ضد لبنان واللبنانيين، رئيس الحركة الوطنية اللي تسببت بمقتل 200.000 لبناني، عمبتقول عنو القوات اللبنانية: "كمال جنبلاط حَيّ فينا".
ولو كان الرئيس برّي متوفي، كانو اكيد قالو عنو الرئيس برّي حَيّ فينا.
صَدِّق أو لا تُصَدِّق، إنّو بلحظة الشهادة، والتجارة بالسياسة شغّالة.
هيك صارت عقيدة القوات. حزب مهووس بشهوة السلطة، بشهوة الرئاسة...
وأيّا رئاسة؟ رئاسة مِن دون صلاحيّات، حيث الرئيس لا يرأس وحيث الحاكم لا يَحكُم.
ومننقل، عن موقع الـmtv، كلام لسعادة النائب ستريدا عبرحديث إذاعي بتاريخ 6-آذار-2015، قالت فيه:
"لا يهمني لقب "السيدة الاولى"، إنما يهمني فقط أن ينال رئيس "القوات" سمير جعجع لقب رئيس جمهورية لبنان، لأنني أرى أنه يتمتع بالقدرات اللازمة ليستلم سدة الرئاسة"
ومنختم ومنقول، ما إلنا أمَل إلّا بقاعدة قواتيّة ناضجة بتعرف تحاسب قيادتها للحَدّ مِن المزيد مِن الهزائم.
الله يرحم رفيقنا بسكال سليمان
نفسك تكون بالسما
دمَّك أمانة برقبة شعبك
كرمالك، وكرمال اللي استشهدوا قبلك، وكرما اللي بعد ما استشهدوا،
منوعدك انو مكملين، بقضيّة مُشَرِّفة ثابتين، بثالوث سياسي متمسكين
"لبنان: فدرالي حيادي سيادي"
د. عماد شمعون