Header Ads

المجتمع المسيحي يدمر نفسه فقط نكاية بميشال عون


القوى المسيحية اللبنانية في مهب الانفجار الديموغرافي والحلف ...
للمسيحين يلي خايفين عالوجود المسيحي وخايفين من تدمير المجتمع المسيحي بسبب الهيمنة الإيرانية بحب قلكن:
إنتو كفيتو ووفيتو!


وسختو صورة رئيس جمهورية،
ما خليتو إشاعة أو كذبة إلا ما نشرتوها،
ما في مسبة ولا منطق استهزاء وسخرية إلا ما استعملتو،
رئيس جمهورية حصد أكتر من ٨٦ ألف صوت بكسروان،
ترأس أكبر حزب مسيحي بالشرق،
كان عندكن فرصة تاريخية تقلبو موازين القوى،
لما كان يعلّي الصوت كنتو نايمين،
ولما وعيتو حملتو مسؤولية كل فساد الدولة،
ميشال عون، عقار واحد بلبنان ما بيملك!
ميشال عون ما عندو ولا كسارة، ولا طرمبة بنزين، ولا بيستورد نفط، ولا عمر قصر ولا سرق أملاك الناس،
ميشال عون ما كان رئيس ميليشيا بالحرب،
كان قائد الجيش اللبناني،
ايه، الجيش يلي بتحلفو هلق وحياتو!
كان قائد الجيش يلي زرع فينا الأمل،
إنو فينا نحارب دول العالم بالإيمان ببلدنا،
ما قبل شعبو ينزّل للمحتل وتآمر الخونة،
ميشال عون حارب السوري المحتل،
وقت الكل كان راضخ للجزمة،
ميشال عون أول مين حكي
بالحرية والسيادة والاستقلال،
ميشال عون أمر بتحرير جرودنا من داعش،
ميشال عون أطلق عملية التنقيب عن النفط، بعد إهمال ٦٠ سنة!
ميشال عون حكي عن أمن لبنان الغذائي وأول مين طالب بعد عودتو من النفي بتحويل اقتصادنا من ريعي لمنتج،
وأول مين طالب بالحفاظ على ثروة لبنان من المي وبناء السدود،


إنتو عنجد خايفين من إيران وحزب الله؟؟؟؟
صراحة إيران ما فيا تعمل يلي إنتو عملتو...
ولا رح تقدر توسّخ صورتها قد ما إنتو وسختو ودمرتو المجتمع المسيحي،

عالقليلة حزب الله أحترم المجتمع المسيحي وإرادة المجتمع المسيحي أكتر بكتير من ما إنتو احترمتوها!

صار كل نايب جاب ألفين صوت،
وكل زغيّر كبرة الخسة براسو،
وكل شخص ما تعيّن زلمتو بموقع بالدولة،
يفتح الحرب ع ميشال عون،

شيطنتو ميشال عون،
وبهدلتو موقع الرئاسة،
وبدل ما توقفو حدو بالمواقف الصعبة،
كنتو أول الشمّاتين،

فضلتو توقفو مع الحريري ضدو، ومع جنبلاط ضدو، ومع برّي ضدو ولك حتى عقد الطفولة عندكن انحلّت وجرائم القتل هانت عليكن...المهم تكسرو...


للأسف، هيدا المجتمع المسيحي يلي دمّر حالو بحالو،
وما اتعظ من التاريخ ولا من الماضي،
والله يرحم يلي قال
#دود_القز_منو_وفيه

1 comment:

  1. دود الخل منو وفيه :) دود القز بيعمل حرير ما بيئذي

    ReplyDelete